Murakkab bichimli dizaynerlar kiyimlarini qanday qilib to'g'ri tozalash kerak?

Siz o'ziga xos va chiroyli ko'rinishni yoqtirasiz, biz esa bunda sizga yordam berishni yaxshi ko'ramiz. Dizaynerlar kiyimini sotib olganingizda, odamlar orasida ajralib turishingiz — bu ayni haqiqat. Ammo tozalash masalasiga kelganda, bu kiyimlar ko'pincha juda injiq bo'lib chiqadi. Bunga sabab mato bo'lishi mumkin, lekin ko'pincha qiyinchilikni kiyimning o'zi keltirib chiqaradi.

Qat-qat burmalar, bir necha qavatli qismlar, qattiq yelkalar, qo'lda tikilgan kashtalar va bezaklar tozalashga turlicha ta'sirchan bo'lishi mumkin, shuning uchun ularni oddiy kir yuvish mashinasida yuvish fikridan darhol voz kechish kerak. Avvalo buyumni yaxshilab o'rganib chiqish zarur - bugun buni aynan qanday qilishni ko'rib chiqamiz!

Qalin astarli va bezakli kashtasi bor shoyi ko'ylakni tasavvur qilaylik. Har bir qism uchun o'ziga xos ishlov berish sharoiti talab qilinadi.

Asosiy mato tanlangan tozalash usulini bemalol ko'tara olishi mumkin. Lekin bunda uning astari qisqarib (kichrayib) ketish ehtimoli bor. Shu sababli butun buyumning shakli "qiyshayib" qoladi. Bezaklar ham rangini o'zgartirishi, shaklini yo'qotishi yoki umuman uzilib tushishi ham mumkin. Natijada, mutaxassis butun kiyimni birma-bir ko'rib chiqishiga, hatto qavatlarini bir-biridan ajratib, qo'lda tozalashiga to'g'ri keladi. Shuning uchun hatto bitta kiyimning o'zidagi turli qismlar ham ko'pincha alohida parvarishni talab qiladi.

Ammo ko'pincha gap faqat gulida (naqshida) yoki astarida emas. Zamonaviy dizaynerlar kiyimi kamdan-kam holatlarda faqat bitta matodan tikiladi. Ba'zi paltolar 100% jundan tikilgan bo'lishi mumkin, lekin tashqi ko'rinishi va ushlab ko'rganda xuddi shunday tuyuladigan boshqa palto tarkibida 30% viskoza bo'lishi ehtimoli bor. Biri yuvishni ko'taradi, ikkinchisi esa kichrayib qoladi.

Har bir mato (yoki ularning o'ziga xos aralashmasi) namlikka, issiqlikka va tozalash vositalariga o'zicha ta'sirchan bo'ladi. Shuning uchun dizaynerlar kiyimini kimyoviy tozalashdan oldin, buyumning tarkibini aniqlash va qanday tikilganligini tekshirish juda muhim. Faqat shundan keyingina ishlov berish usulini tanlash mumkin.

Munchoqlar, yaltiroq toshchalar, tangachalar va kashtalar kiyimni yanada chiroyli qiladi. Shu bilan birga, ular parvarish qilishni qiyinlashtiradi. Ba'zida muammo bezakning o'zida emas, uning qanday mahkamlanganida bo'ladi. Masalan, toshning o'zi tozalash jarayoniga chidashi mumkin, ammo uni yopishtirishda ishlatilgan yelim chiday olmaydi.

Qo'lda tikilgan kashta alohida e'tiborni talab qiladi. Ayrim iplar issiqlikka va tortilib-ishqalanishlarga ta'sirchan bo'ladi. Ba'zilari esa boshidan sifatsiz qilib mahkamlangan bo'lishi ham mumkin. Shuning uchun murakkab bezaklarni oldindan mutaxassisga ko'rsatgan ma'qul.

Kimdir: "Men shunchaki yorliqni o'qiyman, bo'ldi, hammasi joyida!" deb o'ylashi mumkin. Yorliqlarni o'qish - muhim, biz ham shunday qilamiz, ammo bu kiyimni har doim ham yuz foiz xavfdan asrab qololmaydi!

Yorliqdagi ma'lumotlar kiyimlarni parvarish qilishning muhim qismi bo'lib qoladi. Biroq, unda buyum haqida faqat umumiy ma'lumotlar berilgan bo'ladi.

Kiyimga dog' tekkan bo'lishi mumkin. Sotib olingandan keyin ba'zi qismlari almashtirilgan bo'lishi ham mumkin. Qadimiy va qimmatbaho kiyim ko'p yillar davomida noto'g'ri sharoitlarda saqlangan bo'lishi va matoning o'zi o'z xususiyatlarini yo'qotgan bo'lishi mumkin. Shuning uchun kiyim-kechakni professional kimyoviy tozalash avvalo uni ko'zdan kechirishdan boshlanadi. Mutaxassis kiyimning matosini, bichimini, qo'shimcha qismlari va bezaklarini, shuningdek holatini tekshiradi.

Lux Laundry'da buyumni oldindan mutaxassisga ko'rsatish va unga eng mos parvarish usulini aniqlash mumkin.

Ba'zida dizaynerlar kiyimining asosiy qadr-qimmati aynan uning shaklida bo'ladi. Maxsus shakl berilgan yelkalar, korset asoslari, burmalar yoki murakkab qilib taxlangan qismlar ishlov berilgandan keyin ham o'z shaklini saqlab qolishi kerak. Oddiy futbolkaning shakli biroz o'zgarsa ham, bu unchalik bilinmaydi. Ammo murakkab qilib tikilgan kostyum uchun hatto bir necha millimetr farq ham uning bichimini (ustda turishini) o'zgartirib yuborishi mumkin.

Shuning uchun kimyoviy tozalashning yaxshi chiqishi buyumning dastlabki shaklini qanchalik to'g'ri saqlab qolishga ham bog'liq.

Hammasi kiyimning o'ziga bog'liq. Oddiy kashemir sviter va murakkab bezakli oqshom kiyimi butunlay boshqacha yondashuvni talab qiladi. Dizaynerlar kiyimlari uchun barchasiga birdek tushadigan umumiy usulning o'zi yo'q.

Bir necha turdagi matolar, qo'l mehnati, qat-qat burmalar, teri, mo'yna yoki yelimlangan bezaklar birga qo'llanilgan kiyimlarga ayniqsa ehtiyotkorlik bilan munosabatda bo'lish kerak. Agar ikkilanayotgan bo'lsangiz, eng yaxshisi kiyimni avval mutaxassisga ko'rsatishdir.

Agar kiyimlarni professional tozalashga topshirishdan oldin sizda ikkilanish paydo bo'lsa, Lux Laundry'dagi mutaxassislarimizga har doim murojaat qilishingiz mumkin. Kassaning yonidayoq siz bilan birgalikda buyumni o'rganib chiqamiz, barcha izoh va istaklaringizga e'tibor qaratamiz hamda sevimli kiyimlaringizni aynan qanday tozalashimizni aytib beramiz!